Hæstiréttur Íslands kvað upp dóm þann 15. febrúar 2012 í máli nr. 600/2011 er varðaði endurreikning og uppgjör gengistryggðs láns.  Í stuttu máli var niðurstaða dómsins sú að meginreglan er að reikna beri óverðtryggða vexti Seðlabanka Íslands frá upphafi.  Hins vegar séu í undantekningartilvikum skilyrði til að víkja frá meginreglunni.  Ekki megi innheimta hjá lántakendum viðbótargreiðslur fyrir gjalddaga þar sem fullnaðarkvittun liggur fyrir.

Lántakendum með lán sem falla beint undir dóminn hefur verið sent bréf þar sem farið er yfir næstu skref í málum þeirra. Áfram er vinna í gangi varðandi önnur lán sem dómurinn gæti náð til, meðal annars á samráðsvettvangi fjármálafyrirtækja sem Samkeppnisstofnun hefur heimilað. Viðskiptavinir verða upplýstir jafnóðum um framgang þeirrar vinnu.

Lántakendum með lán sem ekki falla beint undir dóminn, þ.e.a.s. lán þar sem ekki var greitt af öllum gjalddögum lánsins, ráðleggjum við að greiða áfram heimsenda greiðsluseðla þangað til skýr niðurstaða liggur fyrir um annað. Eins og fyrrnefndur dómur ber með sér verja lánþegar hagsmuni sína best með því að halda lánum sínum í skilum.